《醫院的凌晨》
細佬佢再次入院了，連飲食都出現困難，本來要排兩年既磁力共振即時做完了，一直好努力既佢，腫瘤導至腦出血，或者，已經係最後的背水一戰了。
肺炎期間連探病都有限制情況下，我地可以二十四小時留係醫院陪住佢。
家人都有了心理準備，或者係最後陪伴佢既時刻到了。
呢條路，好難行，亦好令人恐懼，人生之後的路係點，無人知，比著我，我都會好驚，到底自己將會面對既係乜。
呢幾日，佢已經講唔到野，只可以輕輕眨眼同握手示意。
一個晚上，佢一直都訓，偶爾會鼻痕，而佢都仲識得自己r一下，悠長既醫院凌晨，好靜，冷氣好凍，但佢隻手依家好暖，我坐係床邊一直捉住佢隻手，希望佢知道我地都係身邊，有乜事我地都係度。
尋晚，佢受洗了，一直以來都唔太相信宗教既佢，或者係面對人生最大既困難時，有一番新體會，成為神既兒女，我並唔係基督徒，但我見到佢可以搵到一個歸屬，都好替佢高興。
護士問我地，如果危急關頭幫唔幫佢做創傷性搶救，呢個問題係一兩個星期前我已經問緊，亦唔敢去答，爸爸佢覺得，比佢舒服地離去或者最合適，我同意，但我媽一直都係最著緊佢既人，當年媽媽發現有肺癌動手術後仲住院時，細佬佢發現自己腦癌，或者係疾病之下，佢地一直都好親密，大家既是親人，亦是同伴，我最希望媽媽可以係細佬身邊陪到佢走最後一段路。
呢幾日我地輪住係醫院陪佢，確保二十四小時都有人係度。
你問我最怕係乜……或者係收到家人突而其來既電話……
對於家人講，只係希望陪到佢走最後一段路，不過，你無可能二十四小時長伴左右，好似音樂椅咁，你唔知幾時停，唔知幾時坐，幸運既，可能係我，亦可能係我訓緊或者係工作時間入面，音樂完結。
一直以來，我都覺得自己對生活有好大體會，但係生死呢個層面上，我真係一片空白，一無所知。
對於一直都好支持細佬既朋友，雖然你地同佢素未謀面，但我亦想替佢同大家講聲多謝。
今日望到日出，我突然覺得，原來又一日早晨起到身，開始新一日，係好難能可貴。
Search